Tron

年紀大就唔好成日咁夜瞓啦, 結果有苦真係自己知.

尋晚去咗睇Tron, 老實講, 成個聖誕節最想睇就係呢部, 好友又有好嘢益我, 9:15pm Megabox優先場, 咁近公司, 根本就無理由唔睇, 嘩, 重要IMAX添, 十個正啊!!!!!!!!!!

套戲要帶3D眼鏡, 不過唔係全埸都有效果, 咁都有晒冷嘅位, 唔係你實唱佢搵笨.

我可能真係蠢, 我唔明點解主角可以來去咁容易, By the way, 我都幾奇怪佢做到男主角, 因為佢真係好平凡下喎.....

入正題喇, 我中間瞓著咗, 係, 咁嘈都瞓到啊, 到底係套戲差定我太累, 你地睇完話我知!

愛情戀上癮

其實我係星期一睇, 不過見Naurto 睇完HP7都寫一篇, 咁我唔執輸又寫一篇, HP7粉絲多, 人多勢眾唔使多講, 不過我見FB度唔少朋友單post張海報都已經話一定要睇, 你就知賣肉幾咁易, Sex always sells 又一鐵證!

如果你問我套戲好唔好睇, 齌睇肉就已經要入場啦, 所以一眾知色份子好色之徒你可以去買預售票喇, 唔使再睇落去我寫咩, 反正男女主角都算當打之年, 身材外貌俱佳, 亦非常大方, 呢點已經可以令你打開銀包進貢.


.

.

.

.

.

.

我覺得唔好睇!

Chick flick 除咗要靚人靚景外, 流暢嘅起承轉合都係必須, 所謂流暢嘅起承轉合就即係故事簡單, 有message係好, 不過唔係必需, 你估Sex & The City下下要帶出message咁容易嫁, 不過呢d係bonus, 無呢d但係睇得人賞心悅目其實都算交到功課, 不過呢次個導演編劇出咗事, 無啦啦要玩有深度, 出張咁嘅海報就唔好攪d咁嘢啦, 又還是已經拍好先知衰咗, 諗住張海報幫到忙呢?

我一向對Chick flick要求好統一, 但呢套就係攪多咗, 心思有時真係唔應該亂放, 簡簡單單其實無咩唔好, 畫龍點睛固然好, 但畫蛇添足就多餘囉.

萬聖節之我見

實在好耐無寫blog, 近來工作忙, 為免網友以為我死咗, FB出過都再喺度post多次, 實在我真係支持我嘅論點想法.

唉, d人成日話情人節商品化, 係比商人賺錢, 其實萬聖節咪重商品化, 根本呢一個節日又唔係有假放, 又唔係咩傳統節日, 你唔好同我講呢d係外國傳統啊, 人地外國都係Treat or Trick啫, 幾時要俾幾舊水入主題公園, 又要科水裝身, 意義喺邊度呢? 家下連商場都攪呢攪到嚟搵錢, 情人節起碼對一對情人同埋心愛嘅親友表達心意啊, 但萬聖節又點啊?! 中秋新年聖誕就話親朋好友gathering啫, 萬聖節扮鬼扮馬, 攪到馬騮屎忽咁, 又有咩意義呀?! 當d人要抵制情人節時, 我可唔可以抵制萬聖節啊?!

重咩要咁惱氣? 你知唔知近呢排有幾多朋友,組團同廣告嚟洗我板啊? 情人節就一日啫, 萬聖節玩幾個禮拜, 咁鍾意不如全年慶祝, 扮鬼番工做dress code啦!

有人抵制情人節到要攪情人節食齋團, 咁我不如攪個萬聖節帛把鬼團啦!

告白

我從來都唔係日劇迷, 一直都停留十幾年前Love Generation, Long Vacation Level, 加上喺日本仔公司工作幾年, 受過佢地氣, 從前無特別哈日, 經過那幾年折騰, 更加是植根反日情緒, 差d要參加遊行保釣反日, 日本電影呢? 對上睇嗰套係禮儀師, 都大年半啦, 星期一晚友人Joeanna有飛睇<告白>, 松隆子喎, 下? 佢唔係已經摺咗咩? 原來松隆子不單無摺, 重憑本片又攞獎, 又升呢成為演技派演員!

講番套戲, 松隆子的確做得好, 重有別佢一般演開嘅角色, 深沉冷漠, 工於心計佈局報仇, 佢的確掌握得好, 唯一是戲份不足, 同時片中一班少年亦演得出色, 而且亦令人心寒, 睇完之後, 第一個感覺係現代人物質豐富, 但心靈空虛, 情況不單是發生在大人身上, 連中學生一樣會遇到, 而且佢地對成人社會一知半解, 結果禍闖了出來又不懂收拾, 又有大人去包庇, 令小伙子們失去反省機會, 越踩越深到不能補救......

一向不交代故事內容, 今次也不例外, 但高度推薦要去看, 不過建議入埸前要有充足睡眠, 因為本片文場比較多, 而且枝節要清楚.

十萬個為什麼

點解收$880咁貴?
點解可以開到8場?
點解可以音樂聲蓋過晒d歌聲?
點解可以件件衫都咁醜?
點解可以用LED效果用到個人唔知喺邊到底係咪唱現場?
點解浪花兄弟可以唱"說好的幸福呢"?
點解袁若琳可以唱大半首"黑色幽默"?
點解唔唱"菊花台"?
點解唔唱"安靜"?
點解唔唱"退後"?
點解唔唱"擱淺"?
點解唔唱"回到過去"?
...

一路好走

一路好走

暑期工奇談

友人任職Ibanking, 今年公司一如以往聘請暑期工, 友人在飯局中慶幸自己無需跟這一班暑期工共事, 否則一定小命不保.

既然係I Bank請人, 自然條件就比人優厚, 而且名氣大, 自然多選擇, 一大批名牌大學生慢慢見, 搵到啱先請, 結果今年請三個, 三個都係名牌大學尖子, 偏偏三個都激到友人老細死.

暑期工一號

齋睇成績, 根本就係天才, 跳級上嗰隻, 結果請番嚟無論工作難易, 勢必錯漏百出, 初時以為工作交待不清導致連番失誤, 後來才發現原來此君從來都目空一切, 一直都是出半分力就得一百分, 一直也認為工作無聊, 心存輕視, 友人老細終於忍不住發火出言責備.

暑期工二號

一樣學業成績卓越, 但友人一眼看便心知不妙, 因書蟲外型實在令人無法信服, 加上在迎新會中居然帶記事簿jog notes, 友人及一眾同事即時目瞪口呆, 結果亦一如所料, 表現差強人意, 友人老細同樣地需要訓話, 但二號全程放軟手腳, 即化身軟皮蛇, 友人老細亦為之氣結.

暑期工三號

同樣學業成績卓越, 但就處處表現緊張, 可能解讀為求好心切, 簡單工作交到佢手上往往消耗人家幾倍時間才完成, 友人老細估計其工作能力, 上午派出的工作下班前應可完成, 偏偏她卻逗留到三更半夜, 終於凌晨兩點多時, 友人老細在睡夢中收到三號來電哭訴, 其中据友人老細講三號的經典對白為: “I have already tried my best, but my best does not seem to be enough, what do you want from me?”, 其時友人老細太太正在旁邊, 友人老細收到這種陌生女子哭訴電話, 登時三魂唔見七魄, 結果當然又是一番訓示啦!

友人老細經過今次後, 就想到自己從前是否在以前也犯過類似的問題還是自己有眼無珠, 一番選拔結果都是找來一班問題青年來.

船河奇談

最近去了一次遊船河, 港式遊船河一定有到會食品, 香蕉船, wakeboard, 同甲板曬太陽. 是日活動屬於舊同學邀約, 為其公司management trainee朋友舉辦. Management trainee, 即係出嚟做嘢最多兩三年嗰隻喇, 心諗算啦, 我都係想玩wakeboard, 曬下太陽啫, generation gap都唔係咁大問題啫.

的確去到集合地點, 又真係九成廿五歲左右, 明顯大人地十年八載啦, 好彩話題都接得上, 但當講到書展, 其中一個女仔居然令我O晒咀….

女1: 你記唔記得豬肉啊?
女2: 中學隔離班件肥嘢?
女1: 叫得豬肉都知肥啦, 你記得佢嗰時個樣幾唔掂嫁啦, 你知唔知佢整咗容啊?
女2: 我無見過佢喎, 不過你又知, 你同佢都無咩聯絡嫁?
女1: 我同佢係無聯絡嫁, 不過佢最近做咗”口靚模”, 咁我見到雜誌咪知囉.
女2: 又話佢整咗容, 你點認得啊?
女1: 就係整咗容都認得, 你就知佢幾唔掂啦.
….

聽到呢度, 我都唔敢答咀, 因為我d同學早就變成港女, 中女, 熟女, 剩女, 乾物女, 腐女, 邊有相差得咁遠嫁, la sing……

反斗小尼哥 Le Petit Nicolas

呢套要推薦 — 反斗小尼哥, Le Petit Nicolas

一向香港觀眾都buy大美國片, 英國嘅都少, 法國嘅我真係諗唔到有幾多部喺香港得, 成日都提嘅法國演員蘇菲瑪素我都唔係好講得出佢拍過邊d法國電影又喺香港賣座過…

偏偏尋晚就睇咗呢部好嘢, 先利益申報, 我好憎Home Alone嗰種老人精細路, 唔好搞到佢地細細個就古古惑惑好唔好, 你唔使驚佢大個唔識喎, 隨時未成年已經偷呃拐騙樣樣齊飯飯掂, 就算現實係咁你都俾d幻想我啦, 況且身邊親友嘅小朋友都幾正常健康成長, 唔好呃我話家下啲小朋友全部都極速老化變成老人精, 係個別人間悲劇先會咁.

講番部戲, 我覺得最成功係導演選角, 外形同角色非常配合, 有錢嘅, 為食嘅, 懶訓, 書蟲嘅同學, 個個入形入格, 同埋用小朋友眼光小朋友想法去辦成人事, 攪出連串笑料, 就好似你我小時候發生過嘅經歷咁, 加上服裝道具佈景用心, 畫面和諧, 這種小品的確又有別於同期一眾荷李活大片, 有如一池清泉, 如沐春風. 非常清新, 我個人看完後覺得的確值得推介, 尤其是這電影排在暑假上映, 又沒有強勁宣傳, 幫手讚讚希望有多d朋友會支持.

入睡的必需品

多謝o靚模嘅出現, 令我知道香港地有好多人和事是我不知道而一直存在, 我眼界都因為咁而大開, 試問我地點可以無咗o靚模呢? 大家先睇片.



再睇呢段網上新聞:

http://news.hkheadline.com/dailynews/content_hk/2010/07/22/117068.asp

二十一歲的鄭先生，家中有六、七十本o靚模寫真和精品，今年仍會花七百元來「掃貨」。他坦言，周秀娜的攬枕，已成為他每晚入睡的必需品。

我從來都唔知入睡必需品包埋周秀娜攬枕, 失眠人仕真係要試試, 重有唔知其他攬枕得唔得, 不過相信呢位鄭生就唔得, 多謝o靚模, 多謝周秀娜, 你簡直係一眾宅男救星啊!!!

給蕭開開的信 (三)

Hi 蕭開開, 又係我陳皮薑 Gingy, 估唔到真係一年寫一封信俾妳, 更估唔到寫呢封信係因為妳要離開香港轉戰大陸嘅告別信。

其實樂觀啲睇, 家下大陸商機處處, 幾多人對呢塊肥肉虎視眈眈, 妳可以咁瀟洒話走就走, 呢種拎得起放得低嘅氣魄的確唔係人人有, 而且妳眼見留喺香港工作感情都無發展, 轉換一下環境話唔埋絕地反擊, 丁財兩旺都唔定。

不過妳一個小女子, 就算幾傳奇都好, 始終都係女子一名, 一個人單身喺上海, 再向其他城市進發, 其中不可預期嘅轉變實在超越妳能想像, 大家當然希望妳大步濫過, 百事平安啦, 但如果有咩唔順意, 記住回來並唔等於失敗, 只係接受大陸生活環境跟香港不同, 同失敗無任何關係。

由於呢一次實在存在太多不能預知, 連妳幾時返同會唔會返都唔知, 若然妳事業順利, 愛情得意, 當然會為妳高興, 主人決定今年下半年無論如何都會去探妳一次, 始終人地生疏, 見勢色唔對, 主人就會叫妳火速回歸, 咪荒廢青春, 無事業無愛情又點, 喺香港起碼有友情有親情, 呢啲嘢唔係隨便可以代替, 而且大家亦無可能唔擔心妳, 所以妳除咗追求夢想之外, 亦要好好保重, 無人無物有起事嚟都幾麻煩, 所以妳真係要事事小心, 唔係單係心口掛勇字就得嫁。

我希望下一次封信係全部報喜, 無論係關於妳定係關於主人同佢地一班朋友, 祝每一個朋友都搵到一直追求嘅!

迷失

我好迷失, 因為我已經唔識分辦對錯。

是否今天拿起公義的盾牌, 就可以不顧一切, 逆我者亡?

是否看法不同就天理不容?

我不認同你們的手法, 爭取不是用擾民用破壞用漫駡,失去理性來表現, 可否表現出是你們的遠見氣魄而不是衝動莽為?

我真的想支持你們的, 但我真係做唔到。

唔好怪我有咁想法, 因為我唔係唯一一個。

我唔想你地變成周處, 除三害的周處。

免費 (四) - Sex And The City 2

又是免費做題目, 真擔心有一日有人睇唔過眼, 被人伏擊爆樽, 今次係Sex And The City 2。

其實上一部電影我覺得已經好完滿, 真的無需要再拍下去, 但有fans錢賺, 那有不取之理, 又再斬多四兩, 但真的有keep得住水準嗎?

金光燦爛, 珠光寶氣有budget就做到, 但一眾粉絲都知道不是你用甚麼材料就夠, 一直看的粉絲就是要看背後delivery嗰一個message, 四位主角就好像身邊朋友一樣, 大家關心她們的消息發展, 我總是覺得Carrie 上集已經跟Mr Big結婚, 其他生活上的東西實在不足以支撐, 再沒有上一集的高低起伏, 旁枝亦不夠精彩, 其實我不覺得需要旅行這一段, 此終Sex And The City一直都是關於New York嘛, 好端端搞甚麼海外旅行, 那一段凡令我想起富貴逼人中董標一家人移民加拿大, 硬要給你一種大開眼界的感覺, 可能真的等得太久, 我不否認沒有預期的精彩, 但就像電視劇一樣, 咁多季咁多集, 總有你覺得不精彩的集數吧, 如果已經一直有看的朋友, 我還是覺得應該去看的, 就算是跟舊朋友聚舊吧。

有人說那四個中女有咩好看, 那就表示他跟本是沒有看過Sex And The City, 老友, 你等Megan Fox有戲上先睇啦, 唔使同我討論問我好唔好睇囉。

免費 (三) - 前妻拘捕令

今次輪到免費電影 Bounty Hunter 前妻拘捕令。

剛於上星期一睇完, 有時都想唔到一年有幾多部呢類輕鬆愛情電影, 更想唔到到底睇過幾多部, 最經典首推 Pretty Woman 風月俏佳人, 無論明珠台播幾多次, 轉台見到佢播, 第一反應必然係:"嘩, 又重播?!", 但第二反應就係坐低睇完為止, 呢啲屬於異數, 大部份都係水過鴨背, 春夢不留痕。

美國人實在物資太豐富, 你看他們的超市貨品排列就知道, 引申到電影市場亦一樣, 相近的題材, 類似的配搭, 熟悉的包裝, 只差在你會否依舊付款埋單。一如以往不提故事內容, 原來已經發現沒有其他可以多講了, 可想而知有幾乏善可陳。

作為電視劇Friends的粉絲, 看到現在Jennifer Aniston可算是六人中最成功的, 但她好像一直停留在相似的角色中徘徊, 要知道賣樣賣身材賣可愛不能再多賣多久, 未來真的有需要轉戲路, 至於Gerard Bulter 好像如有神助般, 自戰狼三百後, 不費吹灰之力, 所有電影都賣坐不差, 其實電影本身是流暢, 亦不乏笑料, 只是魚翅吃太多也會感厭悶, 實在這一種電影從來不缺捧場客, 再多也不煩客路, 只是個人而言稍欠驚喜, 亦太過緊守方程式計算。

電影今天正式上畫, 有興趣自己找找。

186光年

台灣友人部落格畢業展, 有空請光臨支持！

免費 (二)

免費的電影之後, 到免費的演唱會, 先講陳奕迅Duo演唱會。

朋友間走兩個極端, 一是早早就四出張羅, 誓要獲得一張門票不罷休, 亦有完全水過鴨背, 不起任何風浪, 我呢? 想看是真的, 但又失去那種非看不可的慾望, 結果亦是從朋友間獲得免費門票。

看前實在太多有關他聲音出問題的報導, 仿佛不說他有這問題就是音盲一般, 但是那又怎樣? 你要去消委會投訴嗎? 歌手也是人, 不可能不生病, 看完他的演唱會, 你會明白甚麼是童叟無欺, 他沒有喪笑扮喊遞咪收花握手位, 就是狀態好唱浮誇你也會替他流冷汗, 居然在聲帶有狀態之下仍要堅持唱這首歌, 我不會挑剔到這樣, 看到他唱到聲嘶力竭, 我只想他好好休息, 畢竟能叫好叫坐的歌手在香港實在不多, 我們實在承受不起再失一員。

回到家中找找, 發現原來第一次看陳奕迅是在98年壽臣劇院的"我的快樂時代"音樂會, 相隔12年, 那時他在華聲發了"與我常在", 算是剛冒起, 在拍"玻璃之城", 同時趕制"我的快樂時代", 並作這次演唱, 物換星移, 今天他由從前少有名氣到現在紅遍中港台, 當中有多少歌曲感動到你我, 有多少是陪伴你我成長, 又有多少是跟你我回憶相連......

免費 (一)

人生中最覺得賺到時, 莫過於免費, 不管價值多少, 只要免費就有爽的感覺, 四月份運氣超好, 得到一場電影兩場演唱會兩張海洋公園入場卷, 注意全都是免費, 不是那種我花五千你送我五十那一種羊毛出在羊身上免費，而是一元不用半分不花那種免費, 所以要分幾篇慢慢寫才算不枉這些免費享受。

免費電影 - 志明與春嬌

免費門票是朋友從網上遊戲獲得的門票, 上星期六便老實不客氣享用了, 電影是拍得流暢的, 一如往常, 本部落格是不會大力落筆在劇情上, 我只想有幾點要拿來討論：

志明與春嬌原屬五月天早期的一首歌, 現成為了兩位主角的名字, 老實說, 你用勞斯和箂斯, 上山和安娜, 阿豬和阿狗, 甚至阿莎阿嬌都可以, 又不見得這個名字有幫助電影於台灣上畫, 那首歌又沒有出現在電影中, 實在無謂得很.

一直沒有留意余文樂, 但身邊有朋友不時稱讚此君外型不俗, 今次一看, 發現他原來演繹角色講對白有問題有懶音及非常不流暢, 外型討好自有公論, 但單憑出眾外型就只會一直停在同一位置上, 不可以提昇到另一層次, 把口條訓練好似乎比買名牌衣服和夜蒲來得實際吧。

楊千嬅這一次的角色跟每當變幻時有相似地方, 都是去到一個人生關口, 在兩個選擇中徘徊, 但今次雖然有涉及姊弟戀, 但都只是輕輕帶過, 看不到楊真的有任何掙扎, 只是隨口兩句我大過你就算, 導演心有餘而力不足, 想講的和做到的有落差。另外回歸現實, 朋友們都不相信不接受一個30多歲化妝小姐會放棄有錢的同居男友跑去跟一個認識一星期比自己小的男生一齊, 就是有, 也必使出渾身解數來巧取豪奪前男友一筆, 恕我等現實, 但香港社會就正是建立這一種風氣給我們, 亦是為何一眾Pretty Woman等荷李活電影美國夢成功之處, 他可以給你幻想並相信會成真, 但香港的......

電影最成功的地方是用了很多很生活化的術語, 地道得很, 從整個故事選角開始, 已肯定不是打海外市場, 亦非合拍片格局, 故可以徹頭徹尾的地道下去, 我不覺得本片粗口特別多, 而且都不是那一種咒駡侮辱性的, 只是很你我生活點滴的, 反正文藝又不及彼邦台灣, 索性來個粗鄙更好, 而且某程度都是在反映現實。

在一起

我一直也以為你放棄了, 一直也以為景氣差令你改變, 想不到突然你又回來了, 別來無恙嗎?

有人一出來一帆風順, 有人一直都默默的努力, 沒有天賦的禮物, 你一步一步的走, 也沒有奇招異術, 今次都一樣, 我也是一樣的希望你不要變, 你繼續你的低調, 不要因為現在風氣不同而作一些不配合你自己的改變,記住喜歡你的就是喜歡你這一些, 留低等你的依然在, 依然跟你在一起。

關我鬼事?!

"一個人在他的崗位上做得好已值得尊敬愛戴, 他私生活關我鬼事?" -- 這一句是取自黃偉文星期日在蘋果日報的Buy Me A Sunday專欄。

我在職場上牛鬼蛇神見不少, 但值得尊敬愛戴的又好像不成正比地低, 尤其是在日本人公司工作的那一段日子, 面對一堆不會尊重人的人, 我只能用相同的咀臉, 你就當我不會笑好了, 反正你也不會管我死活, 所以那段日子真的是人生黑暗期, 苦日子算是涯過, 現在工作是比較稱心如意, 跟美國人歐洲人工作似乎都是比較跟我配合, 但說到尊敬愛戴又好像言重了....

近日城中熱話又怎可以少得了陳總貪污, 好奇怪就是案仍未判, 好像人人也已判了他有罪, 只差在如何和何時發落, 八卦雜誌就更用盡全力地穿鑿附會, 杯弓蛇影地看圖作文, 不過都是Wyman啱, 他私生活關我鬼事? 他有否在他崗位上做得好我不敢妄下斷語, 但身邊不時有人讚他EQ高, 面對冷言挑釁仍然笑臉迎人, 從不動怒地回應, 我只能說他跟很多政府高官在我眼中都差不多, 你又幾時看到馬時亨發火? EQ有時都要看受到的壓力有多大才可定奪, 我给你駡, 到最後那份糧, 那份長俸還不是會到手, 陳總這一次再沒有如浴春風的盈盈笑意, 他這一次跟老宗振聰表現都失常, 是因為自知大難臨頭無路可逃嗎?

冷眼看世情, 一切又真的跟自己無關, 反正陳總的存在與否都不會影響我, 除非那江河日下的節目水準跟他有關, 不過仗著慣性收視這光環, TVB又怎會肯反省改進, 井底之蛙故步自封, 一台獨大不是他的作品獨步天下, 只是對手弱, 全世界正北望神州, TVB現在又那有作品可有如上海灘, 楚留香般可以紅遍兩岸三地? TVB力捧的那些演員歌星, 又可會獲邀出席春節晚會, 那全中國在看的節目? 世界在變在進步, 人就不應固步自封, 把目光放遠, 胃口養大了就不會滿足於是是旦旦提供給你的免費娛樂。

禁慾 (二)

估唔到禁慾篇都可以有延續篇, 真係西片都可以拍績集, 情形有如選美俏臥底一樣。

話說友人最近飽受情困, 同居生活平淡如水, 面對鷄肋般食之無味棄之可惜的感情, 友人正想下堂求去, 奈何恩情難斷, 更困擾的是友人現在同屋不同床, 欠缺性生活以月計的友人在過這種水深火熱的非人生活, 實在苦不堪言, 故不時向眾人大吐苦水；番書妹Nicki便跟友人有此段對話.

友人: 呢期齋爆, 好慘！
N: 咩啊, 我潛心修煉處女心經要禁慾就話啫, 你同人同居, 點樣齋爆啊?
友人: 唉, 你有所不知喇, 我同佢唔夾, 家下佢瞓房我瞓廳, 雖然係同一屋簷下, 但各自為政嫁, 過緊對食嘅日子, 無性無愛啦。
N: 下, 咁你又唔分手?
友人: 咁話晒都有感情, 點可以話走就走, 而且又走去邊喎?
N: 咁又係, 咁你家下咪蛋家鷄見水, 有得睇無得洗?
友人: 咁你話係咪慘喇?!
N: 咁不如你疊埋心水, 同我一齊禁慾啦!
友人: 你去死啦, 你就話係禁慾大使啫, 咁我算係咩啊?
N: 咁你咪接我棒囉, 薪火相傳嘛。
友人: 你都儍嘅, 我呢隻頂盡叫有仔唔食, 罪大惡極, 你呢隻無啦啦, "r"撻啦, 好地地走去禁慾, 都唔知你係咪收埋自己喺屋企禁室培慾啊.
N: 我驚培肉咋。
友人: 咁咪啱囉, 你到時養肥自己而處女膜又自動癒合, 咁咪豬聯璧合囉!
N: DLS!!

本篇純屬虛構, 風格仿傚壹仔東方太陽, 切勿對號入坐!

Mexx Bargain Sales

唔知放上我個blog度會唔會益到大家.



我去過, 真係抵, 唔知聽日重有無好嘢, 下次早d話比大家知.



我嘅戰利品, 承惠20蚊!

奄尖腥悶

今日跟友人飯聚, 提到友儕間單身者眾, 歸根究底原來都係奄尖惹禍. 其實大多單身的人都是犯上了類近的問題, 只是友人有更精闢獨到的見解, 故列出分享:

內容是先從某人有新戀情開始....

B: 幾好呀, 佢終於有新發展。
J: 係啊係啊, 好似幾O嫁。
S: 咁咪好囉, 唔使成日都話拍烏蠅。
B: 咁又係喎, 佢咁挑剔。
S: 挑剔唔係問題, 但要有條件先可以, 唔係你未嫌人米碎, 人地先嫌你囉疏。
J: 咁其實大部份單身嘅問題都係挑剔, 一句講晒--奄尖。
B: 咪係, 你睇下番書妹禁慾大使Nicki(唔知幾時有個咁啜核嘅朵), 佢夠樣靚身材正, 有錢有學歷啦, 咪又係食白果, 都係衰奄尖, 下下要台灣名模高以翔咁款, 又要人靚仔又要人大隻, 全部人話ok佢都可以彈人眼唔夠大, 唔係就腳唔夠長咁, 再唔係又話驚人地係playboy, 你估人又唔驚你係淫娃咩, 咁樣想唔食自己都幾難啦。
S: 咁咪好大鑊?!
B: 咁佢奄尖啫, 未算奄尖腥悶, 重有得救。
J: 咩有分別咩?
B: 有,梗有, 番書妹禁慾大使Nicki係奄尖唔係奄尖腥悶, 空姐Erica先係奄尖腥悶, 佢成日雞蛋裡挑骨頭,但又唔知自己想要d乜!佢好似有病去睇醫生,醫生問佢邊度唔妥又講唔出,仲要掉返轉頭怪個醫生冇料,點解會唔知佢邊度有事咁。
S: 係啦, 上次難得佢話pick-up咗件, 去到又話人地屋企污糟, 又話人地床單d pattern old school, 結果波都唔開就走咗, ONS咋, 都咁有要求, 咁點同佢過人世?! 唔知自己要咩同要啲唔存在於現實生活嘅嘢都係一樣咁難搞。
B: 咪係, 咪話我老江湖唔教精你地, 奄尖腥悶, 老來無伴啊!

單身男人 - A Single Man

又要多謝Joeanna, 今次免費睇新片--單身男人 (A Single Man).

因為此電影未正式在港上畫已經有一堆獎項在身, 加上是前古馳設計師Tom Ford第一次誇足電影圈頭砲, 話題性吸引力十足, 但結果呢? 我自認膚淺, 我唔識欣賞.

我不否認從美學角度它是成功的, Colin Firth穿的衫住的屋開的車, 全都是以靚行頭, 配樂亦看聽得出有用心思, 但故事呢? 一個平淡無奇的故事, 沒有高潮起伏的劇情, 沒有插入旁枝的單線發展, 至於Colin Firth的演出是稱職, 但其實一向Colin Firth都係做開木口木面的角色(可能我睇佢睇得少), 根本就不是屬於破格的表現, 我知道Tom Ford有大班粉絲, 但單是憑美學設計而換得大批讚譽又似乎有點過譽, 只能說本片不難看, 但又未至於出色, 個別場面還有點冷場,而且大部份Collin Firth單獨的場面都可以用一半的時間來交代, 拉長有時是保留想像空間, 但好像又太刻意了點, 而且本故事亦太沉重, 如果想sit back and relax的話, 本片真的不是一個選擇.

我不是專業影評人, 好多時只想看一部有娛樂性而最好有帶一點訊息的, 但請恕我魯鈍, 我真的在本片接收不到.

利是

虎年第一個工作天, 一如往常, 第一天老馮唔做嘢, 竇利是就係唯一任務。

我自細幼受庭訓, 唔可以貪心係唔係都同人講"恭喜發財"搏人俾封利是你, 所以從第一份工作開始都唔會主動走去啲唔熟嘅同事度攞利是. 隨住年紀漸長, 更唔會做呢啲嘢, 費是俾人追番轉頭. 原本上年先轉到宜家間公司, 應該唔使煩, 因為好多同事都唔識, 好衰唔衰年尾升職, 無端端搞到全公司都識我, 想低調都唔可以。

以前遇過一個單身男同事, 年紀唔細, 但又非常愛貪小便宜, 農曆新年呢種攞正牌向以婚人仕打劫嘅行為又點會少得佢, 上至高層, 下至掃地阿姐都唔放過。女仕做呢種行為都唔討好, 重要係一位堂堂大男人, 因此全公司都對此君都甚多批評,上得山多終遇虎, 有一位新來已婚同事就來一記反撃。

事緣該同事在第一個工作天早上就不斷在辦公室各層穿梭往來, 為使無一已婚同事能逃過他的襲擊, 而那位新同事一直也沒有跟該男同事有工作往來, 故他一直也在等新同事身邊已婚同事出現, 以便一次過拜年兼收利是；終於他等到機會,上前向新同事拜年。

單身男同事: 恭喜發財!
新同事: 多謝, 大家咁話！唔好意思, 一直都唔知點稱呼你。
單身男同事: 我叫xxx, 係account dept嘅。
新同事: 哦, 咁我祝你d仔女學業進步啦!
單身男同事開始黑面: 我未婚, 重單身。
新同事: 哎呀! 你成個慈父咁樣, 我以為你做咗人爸爸重有幾個細路tim...
單身男同事西晒面: 我邊有咁好命啊!
新同事: 咁你就真係蝕底喇, 俾封利是仔過你, 好早日結婚, 唔使年年都厚住面皮問人攞利是咁慘啦。

單身男同事手持利是, 黑面而逃。

面書

面書的出現的確為我們社交生活改變了很多, 我一直以為ICQ/MSN/QQ/SKYPE的出現已令很多人的社交生活大受影响, 只要是你網絡裡的人就可以跟全球上任何一個地方的人聯絡. 其中最要命的還是那一堆跟你搞曖昧的人, 你坐在電腦前等對方上線, 看見對方上線又想主動跟對方聊天但又怕被對方洞悉心意, 被動又怕對方不知何時才出手, 連對方心意都要猜度一番, 那種幻得幻失的煎熬相信不少人都領略過.

面書原來給人的煎熬也不遑多讓, 你留一句近況, 對方又來一句回應, 網路上你來我往, 更要命是對方可以在你面書戶口裡盡情溜覽, 同樣地你亦在對方面書戶口內遊歷了不知多少次. 你去了那裡食飯聚會, 他又去了那裡旅行探親, 你們又有那些共同友人, 更甚者, 從共同友人探取對方資料人品工作學歷歷史, 互相猜測.

最吊詭的還是面書可以從你的各項資料找到你的影踪, 你以為一切只發生在有你確認的現在式朋友, 錯了, 你的那些前度, 那些霧水情人, 午夜夢迴突然想起你, 便在網上訪尋你的踪影, 你的近況, 你亦在毫不知情下給你的過去痴纏, 可能換個角度是你死心不息, 對前人尚未忘懷, 從網上冰冷的國度尋找丁點餘溫, 無限漣漪.

可能有一個斬腳趾避沙蟲拒用面書, 但在現代資訊洪流之下, 你這個決定等同堅持用ICQ唔用MSN, 最終身邊朋友在飯局裡熱烈討論面書中某些功能而你只有默默地旁聽, 自我孤立一樣.

個個人都會係第二個人個EX

"個個人都會係第二個人個EX"係之前文章入面的句子, 亦係自己的經驗, 我慶幸身邊朋友無例外的例子, 三十多歲的人生, 如果真的從來無拍過拖, 想起都驚啦, 而且密密換畫就大把, 無拍過拖嘅聖女就真係無識過, 可能我人緣差又識得人少啦.

事出必有因, 否則唔會無端端提起, 事緣最近經朋友介紹認識了一位新朋友, 原來該位新朋友乃是朋友K的舊情人, 一向都抱住"個個人都會係第二個人個EX"心態的我, 既然他們在一起的日子我沒有參與到, 現在己分開我就更不會多理, 可是當這位新友人得知我跟K是朋友後, 他就不時有意無意提到友人K. 我一直認為跟如何跟人談論舊人是一門學問, 所謂分手無惡言, 又不是誰騙了誰, 人都這麼大了, 還需要扯爛塊面去互數不是嗎? 偏偏人家就是不懂這道理, 三不五時跟你來提, 真的是"關我蛋治?!"

最叫我不爽是這位新朋友跟我提到友人K跟他分手以後, 有好一段時間友人K過得並不好, 獨自買醉, 淚洒人前, 又宣稱自己是友人K的最愛, 分手對對方打擊很大云云, 更甚是把性生活的不協調列為分手原因等, 我聽後更對這位新友人很反感, 既然大家都是認真過, 分手後的尊重怎說都應該有, 畢竟是一場相遇相知相愛, 舊愛過不好你會過意得去嗎? 隨便拿來炫耀又是那門子的道理? 倘若友人K真的把他當成一生中最愛, 我只有替友人K感到不值, 一個能隨便拿你過去認真的一段感情來炫耀的人, 怎說也是痴心錯付, 能隨便拿最私密的性生活跟新相識的人來解說成分手理由, 怎說也是不尊重, 人貴自知, 連這種做人基本禮儀都不懂, 這位新友人的人格有多好, 相信大家心中有數吧....

給自己的歌

有多久沒有聽過他有新歌? 我以為他不會再有作品了, 想不到沒有期望之下就來了要細細咀嚼歌詞的新歌--給自己的歌



給自己的歌

想得卻不可得 你奈人生何
該捨的捨不得 只顧著跟往事瞎扯
等你發現時間是賊了 它早已偷光你的選擇
愛戀不過是一場高燒 思念是緊跟著的 好不了的咳

是不能原諒 卻無法阻擋 恨意在夜裡翻牆
是空空蕩蕩 卻嗡嗡作響 誰在你心裡放冷槍
舊愛的誓言像極了一個巴掌 每當你記起一句就捱一個耳光
然後好幾年都聞不得問不得女人香

往事並不如煙 是的 在愛裡念舊也不算美德
可惜戀愛不像寫歌 再認真也成不了風格
我問你見過思念放過誰呢? 不管你是累犯或是從無前科
我認識的只有那合久的分了 沒見過分久的合

歲月 你別催 該來的我不推 該還的還該給的我給
歲月 你別催 走遠的我不追 我不過是想弄清原委

誰能告訴我這是什麼呢?
她的愛 在心裡 埋葬了 抹平了 幾年了 仍有餘威

是不能原諒 卻無法阻擋 愛意在夜裡翻牆
是空空蕩蕩 卻嗡嗡作響 誰在你心裡放冷槍
舊愛的誓言像極了一個巴掌 每當你記起一句就捱一個耳光
然後好幾年都聞不得問不得女人香
然後好幾年都聞不得問不得女人香

想得卻不可得 你奈人生何
想得卻不可得 情愛裡無智者


我一直是李宗盛的粉絲, 愛他對感情看法的透徹, 其實他的作品數量一直不算十分多, 只是流行度高, 想想有多少首熱唱金曲是出自他的手筆, 想想有多少失眠的晚上是由他的歌曲陪伴, 想想有多少失落的時侯用他的歌曲慰藉, 就知道他有多成功, 最想不通是麻甩佬外表包藏著心細如塵的心思想法, 不要以為他只是一味的怨怨怨, 他有很多怨西以外的選擇, 如果他再辦個人演唱會, 希望他會唱這一首...

夜店中的對話

E: 咦, 頭先同嗰件傾咁耐, 有咩咁好傾?
S: 無, 佢係K個EX, 好耐無見, 幾好人嫁, 咁介紹完你地又唔係好理人咁, 我咪招呼下佢囉.
E: 無啦啦咁好死, 想溝人啊?
S: K個EX嚟嫁, 咪玩啦.
E: 個個人都會係第二個人個EX嫁啦.
S: 枉你放洋歸來, 週遊列國, 咩你諗嘢咁港式嫁, 好傾就要溝, 咁一曰廿四小時都唔夠使啦. 你啲想法就要改啦, 好傾就話溝, 望你兩眼就話人睇上你, 有共同話題就話要拍拖, 你咪咁港女公主病上身先得嫁.
E: 超, 你唔抵得我靚多人望啊?!
S: 你唔望人又點知人望你啊, 小姐? 我唔抵得你郁d就咁敏感, 成日自以為是將一己想法無限放大咋, 成日是又當非, 一又當零, Relax D 啦, 香港人...

禁慾

N: SunSun, 我要開始禁慾!
S: 吓, 禁慾?!
N: 係, 堅係!
S: 咪住, 你呢D番書妹知唔知咩係禁慾啊?
N: 知, 禁慾咪唔再卜嘢囉.
S: 係囉, 咁你有幾耐無卜嘢?
N: 年幾囉, 你知我上次分手到宜家都無卜過嘢嫁.
S: 咪係囉, 你根本SET咗禁慾個AUTO MODE喇, 而且呢家嘢唔使登報宣傳, 你又無仔, 用自尉器唔計數嫁.
N: 妖!
S: 係呢, 你無喇喇禁咩慾啊?
N: 成日去蒲都食炸糊, 咪索性禁慾唔蒲囉.
S: 哦, 咁咪靜一排, 西痕先再出嚟蒲囉. 不過唔包到時你又唔食白果, 嗰時西又痕西又癢, 鬼可憐你.
N: DLS!
S: 重有, 以鬼妹計, 你咁耐無卜嘢, 處女膜應該已經自動埋口, 你可以以處女姿態威震娛樂圈啦!
N: 你唔好去死!
S: 咪話我唔教精你, 禁慾之前要先有一段濫用階段, 先至會被禁嫁, 好似D人濫用軟性毒品咁, 咁先會有禁毒嘅出現, 咁你其實濫交咗幾耐啫?
N: DLS x 100次

本篇純屬虛構, 風格仿傚壹仔東方太陽, 切勿對號入坐!

回家

能夠做的, 可以做的, 都已經做了.

得到的, 失去的, 今日看到, 未來亦會有公論.

塵埃已落定, 亦一如預料, 失敗又不是第一次, 中山先生革命也不是一次就成功, 明日開天闢地還是會放在明日的主人翁手上.

記住那些是牛鬼蛇神, 記住那些是牆上野草, 記住那些是敢作敢為. 記住記住...

回家不等於失敗, 只是一個階段的完結, 未來的成功就是由一個一個完結的階段來組成.

金花夫人廟 (六)

無厘喇更, 做咩又整個金花夫人系列六出嚟, 咪就係過咗去嘅星期日, 一眾善男信女去咗還神, 記住有求就有還, 就算求嘅嘢無出現, 都唔等於可以唔還神. 唔做得咁勢利嫁. 一場去到, 順個便沿途影相做記認, 要去嘅朋友好看圖索引喇.

先喺荃灣地鐵站向緣楊坊出口, 小巴總站搭96號小巴.





小巴去到青龍頭總站落車就見到, 非常易去.







祝各位有求必應!