春秋航空

足足一個無update個blog, 唔搵理由喇, 一個字--懶!

不過呢個月都有叫做去咗次旅行, 平平地去咗轉杭州, 係啊, 又係杭州啊! 其實我真係鍾意去杭州, 不過只可以春天同秋天, 夏天可以40度, 冬天又凍到會落雪, 呢d就咪搞我喇.

嗱, 今次都算係有好嘢介紹俾大家, 不過可能好多人都知, 我今次去杭州唔係直航香港飛去杭州, 因為一般直飛都要成兩千蚊港幣, 重未連稅喎, 至於深圳起飛去杭州呢? 其實人仔升值, 國內人收入增加, 大陸內陸機需求已經大大增加, 機票價錢已經升咗好多, 唔會再有以前咁, 門市價同折扣價有成50%差額; 結果我係搭春秋航空香港起飛去上海再陸路去杭州.

春秋航空大約喺世博前開始有香港直飛上海, 當時仲破天荒以港幣$99蚊直飛上海作招徠, 不過我一直唔敢搭, 亦唔信會有咁嘅可能, 不過由於都出現咗一段時間, 又無點聽到投訴, 亦有朋友試過, 咁正好又有朋友想去杭州, 結果就拍板成行.

訂春秋航空機票要用佢地網站, 選好起飛地點日期, 咁就會有機票報價, 我嘅經驗係越遲訂同遇到假期就越貴, 而永遠early bird都係有著數, 我自己就3月16日訂4月16日去4月19日返香港直航上海來回機票, 結果機票連稅及雜項, 共港幣$797! 真係單程深圳去上海都未必得啊!

成名在望演唱會

尋晚去咗Star Hall睇成名在望演唱會, 相信係唱片公司攪個演唱會搵一個帶兩個出嚟, 三個單位只係想睇丁噹, 其他兩個我真係唔識....

先出場係旺福樂團, 睇演唱會之前上過youtube睇佢地d歌, 有d爽快, 有d過癮, 點知現場見到, 幾騎呢下喎, 怪型怪相有盧廣仲在前, 所以唔可以以貌取人嘅, 不過睇完我都係唔識欣賞囉....

跟住出場係MP魔幻力量, 唔講歌, 先講外型, 攪咩呀?! 棒棒堂溝飛輪海, 身邊d小妹妹全部起哄, 大聲叫囂, 咩佢地咁紅咩? 到唱歌啦, 扮玩Rock, 但rocker無理由夾step嗰喎, 重成日擺出晒d以為好型手勢, 我就頂唔順喇, 不過現場d小妹妹就受晒囉.

之後重點嚟喇, 丁噹一出場就脫腳, 唔係佢走音, 係帶嚟嘅音響出問題, 成個rundown因為咁樣改晒, 即場改為即時決定唱咩歌, 好彩佢真係唱得, 歌藝彌補一切, 首本嘅我愛他, 你為什麼說謊呢, 花火, 夜貓, 一半, 冷血動物, 猜不透, 我愛上的全部都有唱, 而且無欺場扮喊扮笑遞咪呢d衰嘢, 晒唱功顯實力, 其中佢唱到我是一隻小小鳥, 我就想到這樣的高音算不算太高!?

多謝晒!!

近日全城熱話自然就係財爺開糧倉, 每人獲分發六千大元現金, 我雖然唔認同佢呢個做法係一個德政, 反正唔會因為我持相反意見就會有咩改變, 而且自己都係其中一個獲益者, 不如想想點用筆錢好過.

早喺不足一個月前收到電郵通知中獎, 其實自小都有中獎命, 不過從來都係小優小惠, 六合彩頭獎從來唔到我份, 但碎濕濕獎就成日中, 戲飛, 禮卷不時都會有, 加上有時朋友送來的戲飛, 演唱會飛, 加加埋埋年中都慳唔少, 不過呢一次就特別少少, 因為呢次係酒店住宿卷.

事源係上年我同朋友喺Cathay Promotion時買咗特價機票去Bangkok, 因為唔係Package咁買, 所以只好自己分開再訂酒店, 當時請教過唔少朋友意見, 當中大部份提議嘅酒店都係超出預算, 結果神推鬼拱就係Facebook廣告度訂咗Novotel Bangkok Fenix Silom, 原因: 一, 佢真係平, 平均港幣五百蚊一晚, 二, Novotel始終係國際連鎖酒店, 自從北上工作機會日多, 住過國營同外資連銷酒店後, 你自然會知國際連鎖酒店真係有質素保證, 相同嘅道理都可以應用喺泰國曼谷之上, 三, 佢係新酒店, 起碼唔會殘殘舊舊先, 果然上次經驗亦都無令我失望, 其實重算好滿意添.

當時網上預訂房間之外, 佢重有個網上遊戲玩, 順便玩埋, 根本無諗過會贏, 甚至已經忘記得一乾二淨, 偏偏人地又咁均真, 收到電郵, 中咗其中一個獎, 獎品係三日兩夜酒店包食宿, 嘩, 家下財爺又派錢, 咁今年都好難唔去多轉泰國啦!

給阿美姐的祝福

許純美暫別幕前1年半 憔悴現身就醫

阿美姐, 妳一定要早日康復, 妳還要學佛, 穿馬靴, 去高島屋百貨買LV包包和藍色睫毛液, 去喝咖啡, 你還要上康熙.....

最近看過...

最近看了幾套電影, 係咁嘅...
最失望是《小人國大歷險》, 睇守完真係想小
最開心是"The kids are alright" 《非親密關係》, 有料到, 好幽默
最估到是"Megamind" 《毛百萬》
最突兀是"Love and Other Drugs" 《愛情戀上癮》, chick flick玩深情, 麻麻....

Tron

年紀大就唔好成日咁夜瞓啦, 結果有苦真係自己知.

尋晚去咗睇Tron, 老實講, 成個聖誕節最想睇就係呢部, 好友又有好嘢益我, 9:15pm Megabox優先場, 咁近公司, 根本就無理由唔睇, 嘩, 重要IMAX添, 十個正啊!!!!!!!!!!

套戲要帶3D眼鏡, 不過唔係全埸都有效果, 咁都有晒冷嘅位, 唔係你實唱佢搵笨.

我可能真係蠢, 我唔明點解主角可以來去咁容易, By the way, 我都幾奇怪佢做到男主角, 因為佢真係好平凡下喎.....

入正題喇, 我中間瞓著咗, 係, 咁嘈都瞓到啊, 到底係套戲差定我太累, 你地睇完話我知!

愛情戀上癮

其實我係星期一睇, 不過見Naurto 睇完HP7都寫一篇, 咁我唔執輸又寫一篇, HP7粉絲多, 人多勢眾唔使多講, 不過我見FB度唔少朋友單post張海報都已經話一定要睇, 你就知賣肉幾咁易, Sex always sells 又一鐵證!

如果你問我套戲好唔好睇, 齌睇肉就已經要入場啦, 所以一眾知色份子好色之徒你可以去買預售票喇, 唔使再睇落去我寫咩, 反正男女主角都算當打之年, 身材外貌俱佳, 亦非常大方, 呢點已經可以令你打開銀包進貢.


.

.

.

.

.

.

我覺得唔好睇!

Chick flick 除咗要靚人靚景外, 流暢嘅起承轉合都係必須, 所謂流暢嘅起承轉合就即係故事簡單, 有message係好, 不過唔係必需, 你估Sex & The City下下要帶出message咁容易嫁, 不過呢d係bonus, 無呢d但係睇得人賞心悅目其實都算交到功課, 不過呢次個導演編劇出咗事, 無啦啦要玩有深度, 出張咁嘅海報就唔好攪d咁嘢啦, 又還是已經拍好先知衰咗, 諗住張海報幫到忙呢?

我一向對Chick flick要求好統一, 但呢套就係攪多咗, 心思有時真係唔應該亂放, 簡簡單單其實無咩唔好, 畫龍點睛固然好, 但畫蛇添足就多餘囉.

萬聖節之我見

實在好耐無寫blog, 近來工作忙, 為免網友以為我死咗, FB出過都再喺度post多次, 實在我真係支持我嘅論點想法.

唉, d人成日話情人節商品化, 係比商人賺錢, 其實萬聖節咪重商品化, 根本呢一個節日又唔係有假放, 又唔係咩傳統節日, 你唔好同我講呢d係外國傳統啊, 人地外國都係Treat or Trick啫, 幾時要俾幾舊水入主題公園, 又要科水裝身, 意義喺邊度呢? 家下連商場都攪呢攪到嚟搵錢, 情人節起碼對一對情人同埋心愛嘅親友表達心意啊, 但萬聖節又點啊?! 中秋新年聖誕就話親朋好友gathering啫, 萬聖節扮鬼扮馬, 攪到馬騮屎忽咁, 又有咩意義呀?! 當d人要抵制情人節時, 我可唔可以抵制萬聖節啊?!

重咩要咁惱氣? 你知唔知近呢排有幾多朋友,組團同廣告嚟洗我板啊? 情人節就一日啫, 萬聖節玩幾個禮拜, 咁鍾意不如全年慶祝, 扮鬼番工做dress code啦!

有人抵制情人節到要攪情人節食齋團, 咁我不如攪個萬聖節帛把鬼團啦!

告白

我從來都唔係日劇迷, 一直都停留十幾年前Love Generation, Long Vacation Level, 加上喺日本仔公司工作幾年, 受過佢地氣, 從前無特別哈日, 經過那幾年折騰, 更加是植根反日情緒, 差d要參加遊行保釣反日, 日本電影呢? 對上睇嗰套係禮儀師, 都大年半啦, 星期一晚友人Joeanna有飛睇<告白>, 松隆子喎, 下? 佢唔係已經摺咗咩? 原來松隆子不單無摺, 重憑本片又攞獎, 又升呢成為演技派演員!

講番套戲, 松隆子的確做得好, 重有別佢一般演開嘅角色, 深沉冷漠, 工於心計佈局報仇, 佢的確掌握得好, 唯一是戲份不足, 同時片中一班少年亦演得出色, 而且亦令人心寒, 睇完之後, 第一個感覺係現代人物質豐富, 但心靈空虛, 情況不單是發生在大人身上, 連中學生一樣會遇到, 而且佢地對成人社會一知半解, 結果禍闖了出來又不懂收拾, 又有大人去包庇, 令小伙子們失去反省機會, 越踩越深到不能補救......

一向不交代故事內容, 今次也不例外, 但高度推薦要去看, 不過建議入埸前要有充足睡眠, 因為本片文場比較多, 而且枝節要清楚.

十萬個為什麼

點解收$880咁貴?
點解可以開到8場?
點解可以音樂聲蓋過晒d歌聲?
點解可以件件衫都咁醜?
點解可以用LED效果用到個人唔知喺邊到底係咪唱現場?
點解浪花兄弟可以唱"說好的幸福呢"?
點解袁若琳可以唱大半首"黑色幽默"?
點解唔唱"菊花台"?
點解唔唱"安靜"?
點解唔唱"退後"?
點解唔唱"擱淺"?
點解唔唱"回到過去"?
...