92黑玫瑰對黑玫瑰

隔一排無放我的收藏品, 今日又玩過. 今次呢張宣傳單張係喺戲院大堂任攞, 我當日貪過癮攞咗收埋到宜家, 呢種戲名最好, 一睇就知邊年出品, 大大隻字"92黑玫瑰對黑玫瑰", 無花無假, 童叟無欺, 計番就知16年前嘅戲, 珍珠都無咁珍.

我重記得我係喺旺角文華戲院睇嘅, 年紀輕經歷少, 好多事好多情都會印象深刻, 宜家重會記得套戲的情節內容橋段笑料, 你宜家問我上星期睇嗰套天使與魔鬼都已經唔多記得清楚.

呢張宣傳單張其實都算有用心用腦做, 仿照50,60年代戲院大堂擺放大堂的宣傳單張, 加上用字, 印刷都有摹擬粵語長片的風格, 同時除了故事內容和人物介紹外, 亦把戲內歌曲歌詞並列, 多了回味嘅意義.宜家電影市道差 (其實點只電影市道!), 電影公司連拍片成本都要慳, 宣傳用嘅錢就更少得可憐, 賣女主角劇照+寫真連故事小說當成另一門生意可能性重高啲.

想一想呢套戲都算好另類, 大賣座但又無咩跟風作品 (我淨係諗到"下集大結局之晴天霹靂", 亦講唔上成功.), 而且以當時來講都唔稱得上大製作大卡士但票房又好, 相差17年, 無論電影市道, 社會風氣雖未至於差天共地, 但的確是江河日下, 難及當年勇.