給蕭開開的信 (二)

Hi 蕭開開, 又係我陳皮薑 Gingy, 估唔到上次寫信俾你到宜家已經有差唔多一年, 更加估唔到嘅係主人班朋友, 包括你各人都有好大轉變, 主人就唔使講喇, 而你呢, 工一份一份咁轉, 感情生活又唔多暢順, 家下你決定唔做嘢, 一個人去Croatia 同 Bosinia流浪, 實在係勇字掛心口, 但難免令人擔心你, 主人話佢地擔心你一個女仔去到呢啲地方俾人攪, 妳居然答你個袋度有兩粒老鼠藥, 有事時就食咗佢, 一死以謝天下, 唉, 呢啲咁消極嘅諗法點係蕭開開以前嘅做法啊?! 換轉以前, 你嗰條撩陰腿又點會咁無"雷"氣, 喺嗰時消失啊, 對方唔死都殘廢喇, 家下你變成咁, 睇嚟現實嘅殘酷對大家都有好大影響.

你去旅行流浪嘅目的唔係要去死, 而係要搵番以前開心活潑嘅蕭開開番嚟, 唔好忘記呢一個先係你嘅旅行的意義. 記住呢一個承諾, 一個月之後實現喇! 我同主人都等你返嚟聽你旅行流浪嘅見聞!